OS VOCEIROS MUNICIPAIS SELAN UN PACTO DE UNIDADE DE ACCIÓN PARA A DEFENSA DOS INTERESES DOS VECIÑOS FRONTE AO PECHE DA SUCURSAL DE ABANCA EN CAMPO LAMEIRO
Os tres grupos políticos con representación na Corporación Municipal de Campo Lameiro, PPdeG, Porvir e PSdeG-PSOE, acordaron por unanimidades selar un pacto de unidade de acción para facer fronte, con tódolos medios democráticos ao seu alcance, á decisión unilateral de peche da sucursal de Abanca no municipio.
O alcalde Carlos Costa e os voceiros de Porvir, Martina Viéitez, e do PSdeG-PSOE, Adrián Vidal, manifestaron na Xunta de Portavoces desta mañá a súa indignación fronte a esta decisión que cualificaron de “inxusta e antisocial” e acordaron convocar un Pleno Extraordinario urxente para o vindeiro martes 17 de agosto ao tempo que abrían un periodo de estudio para levar a cabo accións consensuadas, mobilizacións sociais e aperturar contactos con outras entidades financeiras coa intención de que poidan ocupar nas mellores condicións posibles o oco que deixará previsiblemente Abanca en Campo Lameiro.
Carlos Costa trasladoulle aos voceiros municipais relación das medidas tomadas tras coñecer a noticia, este mércores ás 14 horas, consistentes no envío dunha carta de protesta ao presidente de Abanca, Juan Carlos Escotet; a realización de chamadas aos alcaldes de Poio, Marín, Cerdedo-Cotobade e Forcarei, con problemas similares derivados do peche de oficinas bancarias nos seus territorios, co fin de coordinar actuacións e tamén manter unha xuntanza cos comerciantes, que tivo lugar na tarde-noite de onte.
No transcurso desa xuntanza, os comerciantes pedíronlle ao alcalde a máxima unidade de acción entre os grupos políticos municipais, a realización de xestións para conseguir que se instalara outra entidade financeira ou un axente bancario que dera un servizo similar ao que se perderá e tamén apostaron pola retirada dos depósitos en Abanca en favor do novo prestador do servizo así como a convocatoria de mobilizacións de todo tipo.
O rexedor comprometeuse a seguir mantendo informados aos voceiros dos grupos municipais e a coordinar, pola vía do consenso, calquera iniciativa que se pudera acordar tras a celebración do Pleno do martes. Tamén os convidou a presentar alternativas para ser obxecto de estudio co fin de ser asumidas polo conxunto dos grupos municipais e fomentar a unidade de acción.