O CONCELLO DE CAMPO LAMEIRO REPARTE UNHA ESCOLMA DE LIBROS AOS ESCOLARES DO CENTRO ESCOLAR DENTRO DO PROXECTO DE PREVENCIÓN DE CONDUTAS ADICTIVAS

O Concello de Campo Lameiro, a través do Proxecto de Prevención das Condutas Adictivas, ao cal se uniu este ano, realizou unha primeira actividade preventiva no ámbito educativo que consistiu na entrega de libros de literatura infantil a través dos cales se fomentan hábitos saudabres.

Así, esta mañá o alcalde, Carlos Costa e as concelleiras Nieves Boullosa e Delia Carramal fixeron entrega á directora do centro educativo os libros que foron obxecto de reparto entre o alumnado. Entre os títulos distribuídos estaban “Sopa Verde”, para fomenta-la alimentación saudabre ou “Orellas de Bolboreta” e O Principiño” para impulsa-las  habilidades sociais e dar a coñecer o Proxecto de Prevención entre a comunidade educativa e as familias de Campo Lameiro.

Esta actividade preventiva complementarase con outras que xa se están levando a cabo por parte do profesorado e do departamento de orientación do centro educativo e con obradoiros presenciais ao longo do 2º e 3º trimestre escolar.

Con esta iniciativa, perséguese por en marcha medidas preventivas destinadas a outros ámbitos, reducir os factores de risco da xuventude e da poboación xeral ante as condutas adictivas.