{"id":6345,"date":"2023-02-17T15:57:52","date_gmt":"2023-02-17T14:57:52","guid":{"rendered":"https:\/\/campolameiro.org\/?p=6345"},"modified":"2023-02-17T15:57:52","modified_gmt":"2023-02-17T14:57:52","slug":"o-delegado-da-xunta-en-pontevedra-e-o-xerente-do-consorcio-visitan-o-novo-centro-de-estancia-de-campo-lameiro-que-abrira-as-suas-portas-o-vindeiro-mes-de-marzo-cunha-unidade-de-vida-activa","status":"publish","type":"post","link":"https:\/\/campolameiro.org\/es\/o-delegado-da-xunta-en-pontevedra-e-o-xerente-do-consorcio-visitan-o-novo-centro-de-estancia-de-campo-lameiro-que-abrira-as-suas-portas-o-vindeiro-mes-de-marzo-cunha-unidade-de-vida-activa\/","title":{"rendered":"O DELEGADO DA XUNTA EN PONTEVEDRA E O XERENTE DO CONSORCIO VISITAN O NOVO CENTRO DE ESTANCIA DE CAMPO LAMEIRO, QUE ABRIR\u00c1 AS S\u00daAS PORTAS O VINDEIRO MES DE MARZO CUNHA UNIDADE DE VIDA ACTIVA"},"content":{"rendered":"

A Xunta de Galicia, a trav\u00e9s da Conseller\u00eda de Pol\u00edtica Social e Xuventude, financiou as obras do novo Centro de Estancia do Concello de Campo Lameiro, que v\u00e9n de rematarse e que abrir\u00e1 as s\u00faas portas o vindeiro mes de marzo cunha Unidade de Vida Activa chea de actividades para as persoas maiores.<\/p>\n

O delegado territorial da Xunta en Pontevedra, Luis L\u00f3pez, o xerente do Consorcio Galego de Servizos de Igualdade e Benestar, Perfecto Rodr\u00edguez, e o alcalde, Carlos Costa, e as concelleiras Nieves Boullosa, Eva Campos e Delia Carramal supervisaron este mediod\u00eda as novas instalaci\u00f3ns e informaron da inminente posta en marcha deste servizo durante a visita que realizaron co gallo das xornadas de portas abertas, organizadas polo Concello ata o 27 de febreiro para dar a co\u00f1ecer o centro entre a cidadan\u00eda.<\/p>\n

O Goberno galego invest\u00edu 130.000 euros neste edificio asistencial, impulsado polo Concello de Campo Lameiro e que funcionar\u00e1 os luns, m\u00e9rcores e venres de 10.00 a 13.00 horas. Este centro ten unha superficie de case 400 m\u00b2 nunha \u00fanica altura e disp\u00f3n dunha sala de usos m\u00faltiples de grandes dimensi\u00f3ns, ximnasio, d\u00faas salas de tratamento e rehabilitaci\u00f3n, oficinas, aseos e vestiario.<\/p>\n

O inmoble, con forma de caixa e constru\u00eddo en formig\u00f3n con grandes fiestras para ga\u00f1ar en luminosidade, ten como obxectivo acoller unha Unidade de Vida Activa e numerosas iniciativas orientadas a favorecer un envellecemento activo e saudable. As\u00ed, poranse en marcha obradoiros de memoria, novas tecnolox\u00edas, actividades de exercicio f\u00edsico, coordinaci\u00f3n, equilibrio e forza, e obradoiros emocionais, entre outros.<\/p>\n

VISITA \u00c1 GALI\u00d1A AZUL DE CAMPO LAMEIRO<\/p>\n

Os representante auton\u00f3micos e o rexedor tam\u00e9n se desprazaron ata a escola infantil A Gali\u00f1a Azul, que disp\u00f3n de 25 prazas en d\u00faas unidades para cativos de 0 a 2 anos, para comprobar as melloras realizadas polo Consorcio Galego de Servizos de Igualdade e Benestar.<\/p>\n

Neste espazo infantil invest\u00edronse 25.000 euros para realizar obras de acondicionamento de zonas exteriores e illamento t\u00e9rmico. En concreto, renovouse a carpintar\u00eda de aluminio, os xogos infant\u00eds e o valado de madeira, ao tempo que se acometeron arranxos na instalaci\u00f3n el\u00e9ctrica da calefacci\u00f3n.<\/p>\n

C\u00f3mpre sinalar que, ademais da escola infantil e do futuro Centro de Estancia, o Executivo auton\u00f3mico atende na actualidade a 118 persoas maiores e dependentes de Campo Lameiro a trav\u00e9s do bono de libranzas (15 usuarios), o Servizo de Axuda no Fogar (34 persoas atendidas cunha achega da Xunta de 236.000 euros anuais), a teleasistencia (10 usuarios) e o programa Coidados Porta a Porta. Este servizo itinerante atendeu a 59 veci\u00f1os con citas gratu\u00edtas de audiolox\u00eda, podolox\u00eda e estimulaci\u00f3n da memoria na primeira quenda e volver\u00e1 a ofrecer os seus servizos entre os d\u00edas 10 e 13 de abril.<\/p>\n