O CONCELLO DE CAMPO LAMEIRO COLGA UNHA MÁSCARA XIGANTE NO CONSISTORIO PARA FESTEXAR O ENTROIDO E CELEBRARÁ O SEU DESFILE DE DISFRACES O SÁBADO 4 DE MARZO
O Concello de Campo Lameiro afronta a recta final da celebración do Entroido coa colocación dunha máscara xigante na fachada do Consistorio e ultimando os preparativos do gran desfile de disfraces que terá lugar o vindeiro sábado 4 de marzo, a partir das 17 horas.
Un equipo de voluntarios realizou este ano de recuperación da festa unha careta xigante confeccionada de xeito artesanal e que foi pendurada na fachada do Consistorio. Durante máis dun mes este grupo de persoas afeccionadas ao entroido foron creando da nada unha enorme máscara que simboliza o espírito do entroido de Campo Lameiro que recupera, despois do parón imposto pola pandemia, o seu lema: “Nin Tenerife, nin Río de Janeiro… O mellor entroido en Campo Lameiro”.
Un gran desfile de disfraces arrancará ás 17:00 horas do sábado, 4 de marzo, dende a rúa Veigas de San Miguel e finalizará na estrada de Codesada. O percorrido pasará pola rúa Bernardo Sagasta. Todos os participantes desfilarán e mostrarán as súas habilidades e divertirán ao público no pasarrúas. Ao remate, tras coñecer a decisión do xurado, terá lugar un baile na Praza do Concello amenizada por un DJ.
Nesta edición, o entroido de Campo Lameiro contará coas seguintes comparsas convidadas: Os Solfamidas (Campo Lameiro), Os Paparrulos (Marín), As Sonecas (Campelo), Luces (Tomiño), Las Flores del Carnaval (Monte Porreiro), Revolución Show (Tomiño), Os 100tolos (Campelo), Os Miúdos (Arcade), Os da Caña (Marín) e Os Canecos (Poio).
Todas aquelas persoas e grupos que queiran participar na edición deste ano poderán inscribirse de luns a venres, nas oficinas municipais, en horario de 10:00h a 14:00 horas, cubrindo un impreso normalizado facilitado para ese efecto. Ademais, a organización tamén pon a disposición das persoas interesadas en participar no entroido o teléfono 986 75 20 34 para inscribirse e o email info@campolameiro.com. O día do desfile os participantes deberán recoller o seu dorsal o día do desfile en horario de 15:30h a 16:30 horas no Concello.
A entidade organizadora terá aberto un prazo extraordinario de inscricións o mesmo día do desfile, sábado 4 de marzo, de 15:30h a 16:30 horas, no Concello.
Os premios do desfile aos que se poderán optar son os seguintes:
- a) INDIVIDUAL.
1º Premio………………………………40 euros.
2º Premio………………………………30 euros.
3º Premio………………………………20 euros.
4º Premio………………………………15 euros.
5º Premio………………………………10 euros.
- b) INFANTIL. Grupos
1º Premio………………………………100 euros.
2º Premio………………………………70 euros.
3º Premio………………………………50 euros.
4º Premio………………………………40 euros.
5º Premio………………………………30 euros.
- c) ADULTOS. Individual
1º Premio………………………………100 euros.
2º Premio………………………………70 euros.
3º Premio………………………………50 euros.
4º Premio………………………………35 euros.
- d) ADULTOS. Grupo
1º Premio………………………………320 euros.
2º Premio………………………………190 euros.
3º Premio………………………………140 euros.
4º Premio………………………………110 euros.
- e) COMPARSAS
1º Premio………………………………375 euros.
2º Premio………………………………360 euros.
3º Premio………………………………350 euros.
Ademais, as persoas que participen no desfile tamén poderán optar aos seguintes premios especiais:
– ANIMACIÓN: 3 premios de 100 euros.
– XURADO: 1 premio de 200 euros.
A organización poderá deixar deserto calquera dos premios previstos en función de que se considere que ningún dos participantes reúne méritos suficientes para poder levalo. O fallo do xurado será inapelable e será emitido ao final do desfile, durante o baile na Praza do Concello.
Polo que respecta aos disfraces que entren en concurso, valorarase a súa orixinalidade, dificultade na súa elaboración, así como o bo humor e a soltura desenvolvida polos participantes no desfile.
BASES E NORMATIVA DO ENTROIDO DE CAMPO LAMEIRO 2023:
20230221_Outros_NORMATIVA ENTROIDO 2023 (1)
20230221_Outros_BASES XERAIS REGULADORAS DOS PREMIOS DO ENTROIDO 2023 (2)
